جيتك وأنا قلبي من الشوق محروق

بسم الله الرحمن الرحيم
أصافحكم بهذه الابيات كأول مشاركه لي بهذا المنتدى الراقي أتمنى ان تنال على إعجابكم
جيتك وأنا قلبي من الشوق محروق
أرجووك تطفي لاهب الشوق فيني
يسوقني يمك شهاب الهوى سوق
سوق الركايب للهجاد الدفيني
جيتك على مركب غلاك أسبق الشوق
أسبق من بروق السحاب المتيني
وأشيل في قلبي من الود والذوق
وأصرفهن بدربك يسار ويميني
وقدام وخلافك بعد ورد وعذوق
وتصير في روض الغلا ياضنيني
جيتك وأنا أدري شوفك أصعب من العوق
حسبي على من حال بينك وبيني
لكن ذبحني شوقٍ يسهّر الموق
شوقٍ برى حالي بطول السنيني
شوقٍ ليا من زاد غنيت طاروق
وأخذ وأصفق فوق راحة يديني
ضاعت بي الحيلات والقلب مفتوق
مالي جدى ياكود همّال عيني
ياطير ياللي بالسماء منت مسبوق
رف الجناح الحال عيا يزيني
وأنصى الحبيّب بالتحايا على ذوق
وأشرح له اللي مستهل بكنيني
أسري مع الاشواق والقلب محروق
ولافيه غيره يطفي الشوق فيني